Last Modified: February 29 2012 14:56:35.
 
ത്രിപുരസുന്ദരിനാഥന്‍ നല്‍കിയ
തൃകാലജ്ഞാന സൗഗന്ധികമേ
മോഹമായ ബന്ധമഴിക്കുക
മോഹിനീ നന്ദനനേ

ശരണം ശരണം ശബരിഗിരീശാ
ശരണം ശരണം ജഗദീശാ
നാരദസേവിത സപ്തസ്വരങ്ങളില്‍
നാദരൂപിയായു് ലയിപ്പവനേ

പാലാഴിമഥനം പാടും കഥകളില്‍
ഗൂഢസത്യമായു് ലയിപ്പവനേ
മാനസഭിക്ഷുവായു് വന്നൊരു മഹിഷിയെ
മാളികപ്പുറമായു് മാറ്റിയോനേ (2)

ശരണം ശരണം ഹരിഹരസുതനേ
ശരണം ശരണം ജഗന്മയനേ
ശരണം ശരണമേ ശരണം പൊന്നയ്യപ്പാ
അയ്യപ്പാ ശരണം ശരണം പൊന്നയ്യപ്പാ

ഇരുമുടിക്കെട്ടുമേറ്റിപ്പടിയിറങ്ങുമ്പോള്‍ നെഞ്ചില്‍
വിരിയുന്നു ഭക്തിയുടെ കതിര്‍ക്കുലകള്‍ - സ്വാമീശരണം
സ്വാമിയേ ശരണമെന്ന വിളിയിലീപ്രപഞ്ചത്തിന്‍
സാരമാകെയൊതുങ്ങുന്നു നാദബ്രഹ്മമായി - സ്വാമീശരണം

എരുമേലിയമ്പലത്തില്‍ പേട്ടതുള്ളിപ്പാട്ടും പാടി
ഒരുമയോടയ്യപ്പന്മാര്‍ പുറപ്പെടുന്നു - സ്വാമീശരണം
വാവരുസ്വാമിയെ നന്നായു് വണങ്ങുന്നു, പൂങ്കാവനം
പോയകാലവൈഭവത്തിന്‍ പൂവിടര്‍ത്തുന്നു - സ്വാമീശരണം

ഹരിഹരകഥപാടി പേരെത്തോട്ടിലെത്തിടുമ്പോള്‍
ഹരിഹരസുതന്‍ നമ്മെ അനുഗ്രഹിക്കും - സ്വാമീശരണം
കാളഹട്ടിയിലദംഭദര്‍ശനം ചെയ്തിറങ്ങുമ്പോള്‍
അഴുതയിലലപാടും കീര്‍ത്തനം കേള്‍ക്കാം - സ്വാമീശരണം

അഴുതാനദിക്കരയില്‍ വിരിവച്ചു കിടക്കുമ്പോള്‍
ആത്മവാടിയില്‍ വിരിയും തുളസിപ്പൂക്കള്‍ - സ്വാമീശരണം
പുലരുമ്പോള്‍ സ്നാനം ചെയ്തു കല്ലെടുത്തു നടക്കുന്നു
അഴുതമേടും കടന്നു യാത്രചെയ്യുന്നു - സ്വാമീശരണം

കരിമുഖസോദരന്റെ കഥപാടി നീങ്ങിടുമ്പോള്‍
കല്ലിടേണ്ട കല്ലിടാങ്കുന്നുണര്‍ന്നീടുന്നു - സ്വാമീശരണം
അഴുതയിറക്കംതാണ്ടിക്കരികിലാം തോടും താണ്ടി
അയ്യപ്പന്മാര്‍ കരിമല നടയിലെത്തും - സ്വാമീശരണം
‌
കരിമലകയറുമ്പോള്‍ കാലിടറാതിരിക്കുവാന്‍
കാമവൈരീസതഗീതി മുഴക്കിടേണം - സ്വാമീശരണം
പന്തളവാസനെച്ചൊല്ലിഭണ്ഡിഗാനംപാടി നമ്മള്‍
പമ്പാനദിക്കര കണ്ടുപുളകം കൊള്ളും - സ്വാമീശരണം

പമ്പയാറിന്‍ കുളിരലത്തെളിനീരില്‍ മുങ്ങിടേണം
സങ്കടങ്ങളഖിലവും മറന്നിടേണം - സ്വാമീശരണം
ഇമ്പമോടെ അന്നദാനം നടത്തിനാം മുന്നേറുമ്പോള്‍
തമ്പുരാന്റെ പമ്പവിളക്കകലെക്കാണാം - സ്വാമീശരണം