Last Modified: December 25 2014 14:10:32.



ഏദൻതോട്ടത്തിൻ ഏകാന്തതയിൽ
ആദം ദുഃഖിതനായ് നിന്നു
ആ ദുഃഖത്തിൻ അഗ്നി കെടുത്തിയ
മാദകലാവണ്യമേ - സ്ത്രീയെന്ന
മാദകലാവണ്യമേ

ആദം നിന്നെ പ്രണയിച്ചു
ആദികവി നിന്നെ പ്രണമിച്ചു
പുണ്യത്തിൻ പുഷ്പകിരീടവും പാപത്തിൻ
മുൾമുടിയും നിന്നെയണിയിച്ചു
ജീവിതമണിയിച്ചു (ഏദൻ...)

നഗ്നം നിൻപദം വേദനിച്ചു
നാഗരികതയുടെ നടവഴിയിൽ
ഭഗ്നമോഹങ്ങൾ തൻ ഹോമകുണ്ഡത്തിലൊ-
രഗ്നി പുഷ്പം പോലെ നീ വിടർന്നു
ജ്വാലയായിതൾ വിടർന്നു (ഏദൻ...)