Last Modified: February 29 2012 15:01:31.

ക്ഷേത്രമേതെന്നറിയാത്ത തീർത്ഥയാത്ര
മൂർത്തിയേതെന്നറിയാത്ത കൊടും തപസ്യ
തളർന്നാലും വീഴാത്ത തപസ്വിനി നീ
ഇനിയെങ്ങാണിനിയെങ്ങാണീ യാത്ര
(ക്ഷേത്രമേതെന്നറിയാത്ത)

വ്യർത്ഥമാം സ്വപ്നങ്ങൾ നിൻ വഴിയിൽ - ജീർണ്ണ
സത്രങ്ങൾ പോലെ തെളിയുമ്പോൾ
തീരാത്ത ദുഃഖത്തിൻ മാറാപ്പിൽ തല വെച്ചു
തീരാത്ത ദുഃഖത്തിൻ മാറാപ്പിൽ തല വെച്ചു
നീ നിന്റെ രാത്രികൾ ചിലവഴിക്കും
(ക്ഷേത്രമേതെന്നറിയാത്ത)

കയ്യിൽ നീയേന്തുന്ന ജപമാല - ആരും
കാണാതെ നീയൊഴുക്കും ബാഷ്പധാര
പിന്നിൽ ശൂന്യത മുന്നിലും ശൂന്യത
പിന്നിൽ ശൂന്യത മുന്നിലും ശൂന്യത
നടുവിൽ ജീവിതമാം പ്രഹേളിക
(ക്ഷേത്രമേതെന്നറിയാത്ത)