What is MSI

All
Movies
Songs
Albums
Album Songs
Artists
Year
Ragas
Series

എന്താണ് എം എസ് ഐ ?

എട്ടു പതിറ്റാണ്ട് പിന്നിട്ട മലയാള സിനിമയുടെ സമഗ്രവും ആധികാരികവുമായ രേഖപ്പെടുത്തലാണ് malayalasangeetham.info(MSI) യും അനുബന്ധമായ MMdbയും. ഒരു സിനിമയെ സംബന്ധിച്ച് അറിയേണ്ടതെന്തും ,അറിയാത്തതെന്തും വിരല്‍ത്തുമ്പിലെത്തിക്കുക എന്ന ശ്രമകരമായ ദൌത്യമാണ് MSI നിര്‍വഹിക്കുന്നത്. 2001ല്‍ , കമ്പ്യൂട്ടര്‍ സയന്റിസ്റ്റായ ഒരു അമേരിക്കന്‍ മലയാളി സ്വകാര്യ ആവശ്യത്തിനായി രൂപപ്പെടുത്തിയ ഈ വെബ്സൈറ്റ് 2003ലാണ് ഔദ്യോഗികമായി ആരംഭിച്ചത് .സിനിമയെയും സംഗീതത്തെയും സ്നേഹിക്കുന്ന ,ലോകമെമ്പാടുമുള്ള ഒട്ടനവധി മലയാളികളുടെ നിരന്തരമായ അന്വേഷണത്തിലൂടെയും ഗവേഷണത്തിലൂടെയും സമാഹരിക്കപ്പെടുന്ന വിവരങ്ങള്‍ വസ്തുനിഷ്ഠമായി വിലയിരുത്തി രേഖപ്പെടുത്തുകയാണ് ഈ വെബ്സൈറ്റിന്റെ പ്രവര്‍ത്തകര്‍. ഒരു സിനിമ ഏതു വര്‍ഷം പുറത്തിറങ്ങി , ആരു സംവിധാനം ചെയ്തു , ആരൊക്കെ അഭിനയിച്ചു , ഗാനശില്‍പ്പികള്‍ ആരൊക്കെ ,എന്നിങ്ങനെ സിനിമയെ സംബന്ധിച്ചതെന്തും സമഗ്രമായി രേഖപ്പെടുത്തിയിരിക്കുന്നു ഈ വെബ്സൈറ്റില്‍. കൂടാതെ ഓരോ പാട്ടിന്റെയും വരികളും അവയുടെ രാഗങ്ങളും ,പാട്ടു മനസ്സിലാക്കാനുള്ള ഓഡിയോ ക്ലിപ്പും ചേര്‍ത്തിരിക്കുന്നു , റിലീസ് ചെയ്യാത്തവ ഉള്‍പ്പടെ 5000ല്‍‌പരം ചിത്രങ്ങളില്‍ നിന്ന് 20000ല്‍ പരം ഗാനങ്ങളുടെ വിവരങ്ങള്‍ ‍MSI യില്‍ ലഭ്യമാണ്..കൂടാതെ സിനിമേതര വിഭാഗത്തില്‍ നാടക ഗാനങ്ങള്‍ , ലളിതഗാനങ്ങള്‍ തുടങ്ങിയവയുടെ വിവരങ്ങളും ചേര്‍ത്തിട്ടുണ്ട് , , ഇതിനു പുറമെ ഓരോ ചിത്രത്തിന്റെയും ലഭ്യമായ പാട്ടുപുസ്തകങ്ങളും ,ചിത്ര നിരൂപണങ്ങളും ഈ സൈറ്റിനെ ആധികാരികമാക്കുന്നു , മലയാള സിനിമയിലെ മണ്‍മറഞ്ഞവരുടെയും ജീവിച്ചിരിക്കുന്നവരുടെയും അപൂര്‍വമായ ചിത്രങ്ങള്‍ ഇവിടെ കാണാന്‍ കഴിയും. സിനിമാ സാഹിത്യ വിഷയങ്ങളിലുള്ള ലേഖനങ്ങള്‍ അടങ്ങുന്ന വിശാലമായ ബ്ലോഗ് MSI ക്കു മാത്രം അവകാശപ്പെട്ടതാണ്.

മലയാള ചാനലുകളും , സ്വദേശത്തും വിദേശത്തുമുള്ള റേഡിയോ നിലയങ്ങളും ആധികാരികമായി അവലംബിക്കുന്ന ഏക വെബ്സൈറ്റാണ് malayalasangeetham.info. മലയാള സിനിമയിലെ പ്രമുഖരായ കലാകാരന്മാര്‍ക്കും പ്രവര്‍ത്തകര്‍ക്കും വളരെ സുപരിചിതമാണ് ഈ വെബ്സൈറ്റ്.. ദക്ഷിണാമൂര്‍ത്തിയും യേശുദാസും ഓഎന്‍ വി യും അടക്കമുള്ള പ്രശസ്തര്‍ ഈ വെബ്സൈറ്റ് സന്ദര്‍ശിക്കുകയും അവരുടെ ആശംസയും അഭിനന്ദനവും രേഖപ്പെടുത്തുകയും ചെയ്തിട്ടുണ്ട്.. കാലങ്ങള്‍ക്കപ്പുറം മലയാള സിനിമയുടെ ചരിത്രം അന്വേഷിച്ചു പോകുന്നവര്‍ എത്തിച്ചേരുന്നത് MSI ല്‍ ആയിരിക്കും.

സിനിമയ്ക്കു വേണ്ടി ജീവന്‍ നല്‍കിയ ,ജീവിതം ഹോമിച്ച , മലയാളത്തിന്റെ ഖ്യാതി ലോകമെമ്പാടും എത്തിച്ച ,സിനിമയുടെ അരങ്ങിലും അണിയറയിലും പ്രവര്‍ത്തിച്ചവര്‍ക്കും , പ്രവര്‍ത്തിച്ചു കൊണ്ടിരിക്കുന്നവര്‍ക്കും ,അവരുടെ ഓര്‍മ്മയ്ക്കും അദ്ധ്വാനത്തിനും മുന്നില്‍ ,കൈരളിക്ക് മുന്നില്‍ എം.എസ് ഐ യുടെ സമര്‍പ്പണം........

ഓര്‍മ്മച്ചെപ്പില്‍ ഓമനിച്ച് ഇന്നും താലോലിക്കുന്ന ആ പത്തുപൈസയുടെ പാട്ടുപുസ്തകങ്ങള്‍ , മലയാള സിനിമ നടന്ന വഴികള്‍ , പിന്നിട്ട നാഴികക്കല്ലുകള്‍ , എണ്ണിയാല്‍ തീരാത്ത ഓര്‍മ്മച്ചിത്രങ്ങള്‍ , ബ്ലോഗുകള്‍ തുടങ്ങിയവ ചേര്‍ത്ത് ഇന്ന് ഇന്റര്‍നെറ്റില്‍ ആധികാരികമായി മലയാളസിനിമാ‍ ചരിത്രം സിനിമാസ്നേഹികള്‍ക്കായി അര്‍പ്പിക്കുകയാണ് മലയാളസംഗീതം.ഇന്‍ഫോ അഥവാ എം എസ് ഐ. അജയ് മേനോന്റെ സംഗീതസ്നേഹം മലയാളസിനിമാ ചരിത്രത്തിന്റെ രേഖപ്പെടുത്തലായി മാറിയിരിക്കയാണിവിടെ. മലയാളസിനിമാ ഗാനങ്ങളുടെ സമ്പൂര്‍ണ്ണ വിവരങ്ങളടങ്ങി തുടങ്ങിയ ഈ സൈറ്റ് ഇന്ന് സിനിമാ പ്രവര്‍ത്തകര്‍ , സംഗീതജ്ഞര്‍ , റിയാലിറ്റി ഷോ മത്സരാഥികള്‍ തുടങ്ങിയവരുടെ ഇഷ്ട ലക്ഷ്യമാണ്. റ്റിവി ചാനലുകളും റേഡിയോ നിലയങ്ങളുള്‍പ്പടെയുള്ള ഒട്ടനവധി മാദ്ധ്യമങ്ങളും ഇന്ന് സിനിമാസംഗീത വിവരങ്ങളറിയാനായി എം എസ് ഐ യെ തേടുന്നു എന്നത് ഇതിന്റെ പ്രവര്‍ത്തകര്‍ക്ക് അഭിമാനിക്കാനും ആഹ്ലാദിക്കാനുമുള്ള കാരണമാണ്. ലോകമറിയുന്ന ഒരു സംഗീത കൂട്ടായ്മയാണ് ഇന്ന് എം എസ് ഐ. പ്രമുഖ സിനിമാ ചരിത്രകാരനായ ശ്രീ ബി വിജയകുമാര്‍ , ശ്രീ രവി മേനോന്‍ എന്നിവര്‍ ഇതിന്റെ ഉപദേശകര്‍ കൂടിയാണെന്നു പറയുമ്പോള്‍ എം എസ് ഐയുടെ ആധികാരികതയ്ക്ക് വേറൊരു സാക്ഷ്യപത്രം ആവശ്യമില്ല. നിരന്തരമായ പ്രവര്‍ത്തനത്തിലൂടെ മലയാള സിനിമയിലെ ഏറ്റവും ചെറുതെന്നുപോലും തോന്നുന്ന വിവരങ്ങള്‍ ക്രോഡീകരിച്ച് വരും തലമുറയ്ക്കും കേരള സാംസ്കാരിക ചരിത്രത്തിനു തന്നെയും ഒരു മുതല്‍ക്കൂട്ടാവുകയാണ് എം എസ് ഐ എന്ന മലയാളസംഗീതം.ഇന്‍ഫോ.

2003ൽ ആരംഭിച്ച എം.എം.ഡി.ബി. മലയാള സിനിമകളുടെ ശേഖരമാണ്. മലയാള സിനിമാഗാനങ്ങളുടെ ചരിത്ര പ്രാധാനമായ വിവര ശേഖരമാണ് മലയാള സംഗീതം. ഇൻഫോ എന്ന് മുകളില്‍ സൂചിപ്പിച്ചുവല്ലോ. 2005ൽ ആരംഭിച്ച ഈ കൂട്ടായ്മ യാതൊരു ലാഭേച്ഛയും കൂടാതെ പ്രവർത്തിക്കുന്ന കുറേ സഹൃദയരുടെ കഠിനാധ്വാനം കൊണ്ട് നാൾക്കുനാൾ പുഷ്ടിപ്പെട്ടു വരുന്നു.

മലയാള സംഗീതത്തിന്റെ വെബ് സൈറ്റിൽ പോകാതെ തന്നെ ഗൂഗിൾ സർച്ച് വഴി ശേഖരത്തിലെ വിവരങ്ങൾ അന്വേഷിക്കാം.

ഇവിടെ തന്നെ താരങ്ങളുടെ , ഗായകരുടെ , നിർമ്മാതാക്കളുടെ , സംവിധായകരുടെ എല്ലാം നഖ ചിത്രങ്ങൾ വായിക്കാം. പൂർണ്ണതയെത്തിയില്ലാത്ത ഈ സംരഭം തുടരുന്നു.

ഗാനങ്ങളുടെ പേജിൽ വിഡിയോ ക്ലിപ്പുകളിലേക്കുള്ള ലിങ്ക് കൊടുത്തിട്ടുണ്ട്. ലിറിക്സ് വായിക്കാം. സംവിധായകൻ ഉപയോഗിച്ച രാഗ വിവരങ്ങൾ മനസ്സിലാക്കാം. പാട്ടു പുസ്തകങ്ങളുടെ ശേഖരം പരിശോധിക്കാം. ആധികാരിക ഗ്രന്ഥങ്ങൾ നോക്കാം.

സജീവമായ ഞങ്ങളുടെ ബ്ലോഗിൽ നിങ്ങൾക്ക് പല പ്രസിദ്ധീകരണങ്ങളിൽ നിന്നും ഇവിടെ എത്തിച്ച വിജ്ഞാനപ്രദങ്ങളായ ലേഖനങ്ങൾ കാണാം. അനുഭവ സമ്പന്നരായ ചിലരുടെ വേറെ എവിടെയും കാണാത്ത ലേഖനങ്ങൾ വായിക്കാം.

ഞങ്ങളുടെ ഡാറ്റാബേസിന്റെ വളരെ സംക്ഷിപ്തമായ ഒരു രൂപ രേഖ മാത്രമാണിതു്. അന്വേഷണ കുതുകിയായ ഒരു സന്ദർശകൻ ഇവിടെ എത്തിപ്പെട്ടാൽ പെട്ടന്നു തിരിച്ചു പോകുമെന്നു ഞങ്ങൾ വിശ്വസിക്കുന്നില്ല.